Unha muller tivo que ser asistida por causa dun incendio na súa casa de Negreira

Un incendio destrúe a cociña e a terraza dun piso de Negreira, e provoca estragos en todo o inmoble.

O lume puido orixinarse nun electrodoméstico da cociña. Non causou danos persoais, aínda que unha muller tivo que ser atendida ao sufrir un mareo.

O incendio comezou contra as dúas e media da tarde na cociña do primeiro piso deste edificio do centro de Negreira, preto de Santiago.

O lume destruíu a cociña e unha terraza contigua. O fume e as altas temperaturas causaron danos no resto do andar e na planta superior. Nos dous pisos viven membros da mesma familia, que puideron saír polo seu propio pé. Non houbo que lamentar danos persoais, aínda que a unha das donas tiveron que asistila as urxencias sanitarias porque sufriu un mareo e desmaiouse.

Na extinción do incendio participaron efectivos do parque de bombeiros de Santa Comba e do GES de Brión.

"A extinción durou dúas horas. Houbo que sacar dúas bombonas polo perigo que podían entrañar. Para acceder á terraza houbo que entrar con equipos de respiración debido a que o fume afectou a propia vivenda e o segundo andar."

Non están claras as causas do incendio aínda que se pensa que puido empezar nunha fritideira que había na cociña.